सम्पदा संरक्षण विधेयकमा आदिवासी जनजाति र समुदायको कानूनी अपेक्षा समेट्न विज्ञहरूको सुझाव

काठमाडौँ । अभौतिक सांस्कृतिक सम्पदा संरक्षणसम्बन्धी विधेयकमा सम्पदाप्रति समुदायको कानूनी अपेक्षा, संवैधानिक अधिकार र आदिवासी जनजातिको प्रतिनिधित्वलाई केन्द्रमा राख्न विज्ञहरूले सुझाव दिएका छन्।

शुक्रबार सिंहदरबारमा बसेको प्रतिनिधि सभा अन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा विधेयकमाथिको छलफलका क्रममा विज्ञहरूले यस्तो सुझाव दिएका हुन्। उनीहरूले अभौतिक सम्पदासम्बन्धी अन्तर्राष्ट्रिय कानून र सन्धि सम्झौताहरूको गहिरो अध्ययन गरेर विधेयकलाई समृद्ध बनाउनुपर्नेमा जोड दिए।