विदेशबाट ल्याइएको मोबाइल र ल्यापटसहित ३७ लाखको सामान एयरपोर्टबाट बरामद

काठमाडौँ । विदेशबाट त्रिभुवन अन्तर्राष्ट्रिय विमानस्थल हुँदै ल्याइएको ३७ लाख मूल्य बराबरको ग्याजेट र भेप प्रहरीले बरामद गरेको छ । असार ३० र ३२ गते भन्सार पास भएपछि चेकजाँच गर्दा भन्सार छलेर लैजान लागेको अवस्थामा प्रहरीले मोबाइल, ल्यापटप र भेप बरामद गरेको हो ।

मोबाइल, ल्यापटप, आइप्याड, भेप, भेपको फ्लेबर र भेपको क्याप सहित ३७ लाख मूल्य बराबरको सामान बरामद गरिएको विमानस्थल सुरक्षा कार्यालयका एसपी राजकुमार सिलवालले रातोपाटीलाई बताए । सो सामान भन्सार जाँच पासमा बसेका कर्मचारी र सशस्त्र प्रहरीको टोलीलाई झुक्याएर आरोपीहरूले बाहिर ल्याएको भेटेपछि प्रहरीले बरामद गरेको हो ।