प्रसुतिका क्रममा मृत्यु प्रकरण - एभरेस्ट अस्पताल र डा. ज्योत्सना शर्मालाई ३९ लाख क्षतिपूर्ती भराउने फैसला

काठमाडौं - उपभोक्ता अदालतले प्रसूतिको क्रममा उपचारमा लापरबाही भएको ठहर गर्दै एभरेस्ट अस्पताल र स्त्री तथा प्रसूति रोग विशेषज्ञ डा. ज्योत्सना शर्मा तिवारीलाई पीडित परिवारलाई कुल ३९ लाख रुपैयाँ क्षतिपूर्ति तिर्न आदेश दिएको छ।

अदालतले एभरेस्ट अस्पतालबाट ३० लाख र डा. तिवारीबाट ९ लाख रुपैयाँ क्षतिपूर्ति भराउन फैसला गरेको हो। गर्भावस्थामा ‘सिभियर प्रि–एक्लेम्प्सिया’ भएकी मनिता शर्मालाई सिजेरियन शल्यक्रियाअघि अनिवार्य मानिने म्याग्नेसियम सल्फेट औषधि नदिई शल्यक्रियापछि मात्र दिइएकोलाई अदालतले उपचारमा गम्भीर लापरबाही मानेको छ।