नागढुंगा सुरुङमार्ग साउन ११ गतेदेखि परीक्षण सञ्चालनमा

निर्माण सम्पन्न भएको करिब एक वर्षपछि नागढुंगा सुरुङमार्ग आगामी साउन ११ गतेदेखि परीक्षणका रूपमा सञ्चालनमा आउने भएको छ। विभिन्न प्राविधिक तथा व्यवस्थापकीय कारणले सञ्चालनमा आउन ढिलाइ भएको सुरुङमार्ग अब चरणबद्ध रूपमा सञ्चालनमा ल्याइने तयारी गरिएको हो।

सडक विभागका महानिर्देशक डा. विजय जैसीका अनुसार साउन ११ गते सुरुङमार्गको औपचारिक उद्घाटन गर्ने तयारी गरिएको छ। उद्घाटन कार्यक्रममा जापान अन्तर्राष्ट्रिय सहयोग नियोग (जाइका) का प्रतिनिधिहरू सहभागी हुनेछन्। उद्घाटन प्रधानमन्त्री वा मन्त्रीमध्ये कसले गर्ने भन्ने विषय भने टुंगो लाग्न बाँकी रहेको उनले बताए।