विपद्‍बारे पूर्वसूचना नदिएको आरोपमाथि चिनियाँ दूतावासले खण्डन गर्दै भन्यो - नेपालसँग निरन्तर सहकार्यमा छौं

काठमाडौं : भोटेकोशीको विनाशकारी बाढी–पहिरोबारे पूर्वसूचना नदिएको भन्दै सामाजिक सञ्जालमा भइरहेको आलोचनाप्रति नेपालस्थित चिनियाँ दूतावासले गम्भीर ध्यानाकर्षण भएको जनाएको छ। दूतावासले वक्तव्य जारी गर्दै हिमालय क्षेत्रको जटिल भौगोलिक बनावट र प्रविधिको सीमाभित्र रहेर चीनले नेपाललाई निरन्तर सूचना तथा तथ्यांक उपलब्ध गराइरहेको प्रस्ट्याएको हो।

दूतावासका अनुसार उच्च हिमाली क्षेत्र (४,००० देखि ५,००० मिटर वा सोभन्दा माथि) मा रहेका हिमताल, हिउँ र चट्टानका पिण्डहरूको स्थिति भौगोलिक कठिनताका कारण कर्मचारी खटाएर प्रत्यक्ष अनुगमन गर्न सम्भव हुँदैन। विशाल एवं जटिल भूभागमा उच्च-सटीक अनुगमन गर्नु अन्तर्राष्ट्रिय प्रविधिका लागिसमेत चुनौतीका रूपमा रहेको दूतावासले जनाएको छ।