डडेल्धुरामा बोलेरो जीप दुर्घटना अपडेट : दुई मृतक र तीन घाइतेको खुल्यो पहिचान

डडेल्धुरा : डडेल्धुराको अमरगढी नगरपालिका–७ खसरेखानमा शनिबार बिहान भएको बोलेरो जीप दुर्घटनामा परी मृत्यु हुने दुवैको पहिचान खुलेको छ। उक्त जीप दुर्घटनामा परी दुई जनाको घटनास्थलमै मृत्यु भएको छ भने तीन जना घाइते भएका छन् । सशस्त्र प्रहरी बल, नेपाल नं. ५२ गुल्म डडेल्धुराका अनुसार धनगढीबाट दार्चुलातर्फ जाँदै गरेको सु.प.प्र.०१–००१ ज १८५० नम्बरको बोलेरो जीप शनिबार बिहान करिब ३ः३० बजे अनियन्त्रित भई सडकबाट करिब ३००–४०० मिटर तल खसेको हो ।

दुर्घटनामा दार्चुलाको अपिहिमाल गाउँपालिका–१ का ४५ वर्षीय सुगन लोथ्याल र २८ वर्षीया हनु लोथ्यालको घटनास्थलमै मृत्यु भएको सशस्त्र प्रहरीले जनाएको छ । दुर्घटनामा जीप चालक बैतडीको डिलाशैनी गाउँपालिका–२ का २० वर्षीय अमृत घरेडी घाइते भएका छन् । साथै दार्चुलाको मार्मा गाउँपालिका–३ का ५० वर्षीय अम्मरसिंह ठगुन्ना र अपिहिमाल गाउँपालिका–१ की ३५ वर्षीया सरस्वती लोथ्याल घाइते भएका छन् ।