निजीमा स्वास्थ्य बीमा रोक्दा कोशी अस्पतालमा भद्रगोल

विराटनगर । विराटनगरमा सोमबार अधिकतम तापक्रम ३८ डिग्री सेल्सियस पुग्यो । मंगलबार ३७ डिग्री सेल्सियस भनिए पनि बाहिर निस्किँदा छाला पोल्ने तातो हावा चलिरहेको छ । जसका कारण स्वस्थ मानिसहरू घरबाहिर निस्किन सकेका छैनन् ।

यस्तो ज्यानै पोल्ने उकुसमुकुस र खपिनसक्नु गर्मीमा विराटनगरस्थित कोशी अस्पतालको प्राङ्गणमा सयौँको लाइन देखिन्छ । उपचारका लागि लामो र कष्टकर बाटो तय गरेर आएका सयौँ बिरामी त्यही आगो ओकल्ने घाममा घण्टौँसम्म पालो कुर्दै लाइनमा उभिन बाध्य छन् । घण्टौँको पर्खाइ र गर्मीले गर्दा उनीहरूलाई रोगले भन्दा बढी त्यही लाइनले थप बिरामी बनाउने जोखिम छ ।