एसियाड तयारी : टेबलटेनिस च्याम्पियन संयोग र योङ्गी दक्षिण कोरिया प्रस्थान

काठमाडौँ । जापानको आइची र नागोयामा आयोजना हुने २० औँ एसियाली खेलकुद (एसियाड) को वैदेशिक प्रशिक्षणका लागि नेपालका टेबलटेनिस खेलाडी संयोग कपाली र योङ्गी पौडेल दक्षिण कोरियाको सिओल प्रस्थान गरेका छन्। राष्ट्रिय च्याम्पियनद्वय संयोग र योङ्गी शनिबार त्यतातर्फ लागेका हुन्।

अखिल नेपाल टेबल टेनिस संघका कोषाध्यक्ष ज्याकी महर्जनका अनुसार दुवै खेलाडी सिओलस्थित डोक्सान हाई स्कुलमा सञ्चालन हुने एक महिने विशेष प्रशिक्षणमा सहभागी हुनेछन्। यो प्रशिक्षण जुलाई १८ देखि अगस्ट १८ तारिखसम्म चल्नेछ। सन् १९८८ को सिओल ओलम्पिककी स्वर्ण पदक विजेता याङ यङ्जाको निमन्त्रणामा नेपाली खेलाडीहरू यस प्रशिक्षणमा सहभागी हुन लागेका हुन्।