टोनी हेगनको 'नमूना जिरी'

जिरीको लिङ्कन बजारको मुटुमै रहेछ होटल यार्सा। झोला बिसाएर केहीबेर आराम गर्यौँ। हामी सबैभन्दा अगाडि आएछौँ। व्यवस्थापन टिमका साथीहरू सबै अतिथिलाई वासको व्यवस्था मिलाउने धमाधममा हुनुहुन्छ। भवानी दिदी भन्नुहुन्छ, ’लु जाऔँ तल गाई आनुवांशिक स्रोत केन्द्र।’

भवानी दिदीमा ऊर्जाको भेल अचम्म किसिमले बगेको देख्छु। न गोडा थाकेका छन् न उत्साह। सँगै आएका कोही साथी गलित-थकित छन् तर हामीलाई भवानीको ऊर्जाले तानेर आलस्य त स्वाट्ट हटायो। लागेको थियो गाडीबाट झरेपछि त आरामको ओढ्ने ओढेर पल्टिन्छु। जिरीको सौन्दर्य त दबाई पनि पो रहेछ। गाडीको थकाइ त जिरीको स्वच्छताले छुमन्तर तुल्यायो। हामी ऊर्जावान् भयौँ।