न्याय प्रणालीको सुदृढीकरणका लागि बार र बेन्चको सहकार्य जरुरी: प्रधानन्यायाधीश शर्मा

काठमाडौँ । प्रधानन्यायाधीश डा मनोजकुमार शर्माले देशको न्याय प्रणालीलाई थप सुदृढ र प्रभावकारी बनाउन बार (कानून व्यवसायी) र बेन्च (न्यायाधीश) बीच बलियो सहकार्य हुनुपर्नेमा जोड दिएका छन्। सर्वोच्च अदालत बार एसोसिएसनले आज आयोजना गरेको आफ्नो स्वागत तथा पूर्वप्रधानन्यायाधीश प्रकाशमानसिंह राउतको बिदाइ कार्यक्रममा उनले यस्तो धारणा राखेका हुन्।

कार्यक्रमलाई सम्बोधन गर्दै प्रधानन्यायाधीश शर्माले न्याय क्षेत्रको समग्र सुधार र सहज न्याय सम्पादनका लागि बार र बेन्चको आपसी सहकार्य अपरिहार्य रहेको बताए। "विधिको शासन, संविधानको सर्वोच्चता र मानव अधिकारको संरक्षणमा सर्वोच्च बारको भूमिका सधैँ महत्त्वपूर्ण हुन्छ," प्रधानन्यायाधीश शर्माले भने, "त्यसैले बेन्च र बारले एकापसमा परिपूरकका रूपमा मिलेर काम गर्नुपर्छ।"