सरकारको शून्य बाँकी फाइल नीतिलाई गिज्याउँदै दूरसञ्चार प्राधिकरण, १३ महिनादेखि फाइल घुमेको घुम्यै

काठमाडौँ । नेपालमा अधिकांश इन्टरनेट प्याकेजहरू ट्यारिफ स्वीकृति बिना नै बिक्री भइरहेको पाइएको छ । नियामक नेपाल दूरसञ्चार प्राधिकरणको कमजोरीका कारण देशको इन्टरनेट बजार अनियन्त्रित बनेको हो ।

पछिल्लो १३ महिना यता प्राधिकरणले कुनै पनि इन्टरनेट प्याकेजका लागि ट्यारिफ स्वीकृत गरेको छैन । तर बजारमा सेवा प्रदायकले आफ्नै स्वविवेकमा नयाँ नयाँ इन्टरनेट प्याकेजहरू ल्याइरहेका छन् । प्रमुख इन्टरनेट सेवा प्रदायक (आईएसपी) कम्पनीहरूले समेत सेवा शुल्क (ट्यारिफ) स्वीकृति नलिई इन्टरनेट प्याकेजहरू बिक्री गरिरहेका छन् ।