ट्राफिक व्यवस्थापनमा देखिने राज्यको अनुहार

मुगुका २५ वर्षीय गणेश नेपालीले आत्मदाहको प्रयासपछि ज्यान गुमाएको घटनाले नेपालमा, विशेषतः काठमाडौं उपत्यकामा, ट्राफिक व्यवस्थापन र ट्राफिक तथा नगर प्रहरीको कार्यसम्पादन बारे व्यापक बहस जन्माएको छ। यो घटना एउटा व्यक्तिको दुःखद् अन्त्यमा मात्र सीमित छैन; यसले राज्यको सेवा प्रवाह, कानून कार्यान्वयन र नागरिक–प्रहरी सम्बन्ध बारे गम्भीर प्रश्न समेत उठाएको छ।

मानव सभ्यताको विकाससँगै बाटोघाटोको विस्तार भएको हो। मानिस बीच आवतजावत सहज बनाउन र वस्तु तथा सेवाको ढुवानी गर्न सडक अपरिहार्य पूर्वाधार हो। त्यसैले सडकलाई कुनै पनि देशको आर्थिक तथा सामाजिक विकासको मेरुदण्ड मानिन्छ। नेपालमा पनि गोरेटो, घोडेटो, फड्के र पुल हुँदै आज गाउँ–गाउँसम्म सडक पुगेका छन्। अधिकांश प्रमुख राजमार्ग र शहरी सडक कालोपत्रे भइसकेका छन् भने सडक विस्तार र स्तरोन्नतिको काम अझै जारी छ।