गर्मीले विद्यार्थी बेहोस भएर ढल्न थालेपछि बर्दिबासका विद्यालय बिदा

महोत्तरी : गर्मी असह्य भएर जनजीवन अस्तव्यस्त भएपछि बर्दिवास नगरपालिकाले स्थानीय बिद्यालयहरुमा दुई दिनका लागि गर्मी विदा दिइएको छ । बर्दिवास नगरपालिकाको कार्यालयले जारी गरिएको सूचना अनुसार नगरभरिका सञ्चालित सामुदायिक, निजी तथा धार्मिक बिद्यालयहरुमा बिहीबार र शुक्रबार गरी दुई दिनका लागि विदाको प्रबन्ध गरिएको छ ।

अत्याधिक गर्मी र तातो हावा (लु) का कारण विद्यार्थीहरू कक्षा कोठामै बेहोस हुन थालेपछि यहाँ सञ्चालित सम्पूर्ण विद्यालयहरुमा गर्मी विदा मिलाइएको प्रमुख प्रशासकीय अधिकृत राममणि अधिकारीले जनाएको छ । निरन्तर बढ्दो तापक्रम र लुका कारण विद्यार्थीहरूको स्वास्थ्य, सुरक्षा तथा हितलाई ध्यानमा राख्दै यस्तो निर्णय गरिएको अधिकारीले बताए ।