चीनद्वारा गोप्य परमाणु मिसाइल परीक्षण

काठमाडौं । अमेरिका इरानसँगको बढ्दो सैन्य तनावमा केन्द्रित रहेका बेला चीनले समुद्रमुनिबाट परमाणु वारहेड बोक्नसक्ने ब्यालिस्टिक मिसाइलको गोप्य परीक्षण गरेको दाबी गरिएको छ । एक नयाँ प्रतिवेदनले अमेरिकाको ध्यान पश्चिम एसियाको युद्धमा केन्द्रित भएका कारण चीनको यो गतिविधिले अपेक्षित अन्तर्राष्ट्रिय ध्यान नपाएको उल्लेख गरेको छ ।

एसिया मिडिया सेन्टरले प्रकाशित गरेको विशेष प्रतिवेदनअनुसार चीनले मिसाइल परीक्षणका लागि रोजेको समय रणनीतिक रूपमा महत्त्वपूर्ण देखिएको बताइएको छ । प्रतिवेदनमा गत फेब्रुअरीको अन्त्यदेखि अमेरिका इरानसँगको सैन्य द्वन्द्वमा व्यस्त रहेको उल्लेख छ । चीनले पनडुब्बीबाट मिसाइल परीक्षण गरेको समय पनि अमेरिका–इरानबीचको सैन्य तनाव उत्कर्षमा पुगेको अवधि थियो ।