सेवासुविधा विनियमावली स्वीकृतिको माग गर्दै भक्तपुर क्यान्सर अस्पतालका कर्मचारी आन्दोलित

भक्तपुर क्यान्सर अस्पतालका कर्मचारीहरूले कर्मचारी सेवाका शर्त तथा सुविधा विनियमावली–२०८३ तत्काल स्वीकृत गर्न माग गर्दै आन्दोलन सुरु गरेका छन्। आन्दोलनको पहिलो चरणअन्तर्गत उनीहरूले सोमबार हातमा कालोपट्टी बाँधेर नियमित सेवा प्रवाह गर्दै विरोध जनाएका हुन्।

आन्दोलनका क्रममा कर्मचारीहरूले करिब एक घण्टा प्रदर्शन पनि गरेका थिए। सुरुमा अस्पताल परिसरमा सबै कर्मचारीलाई भेला गरी आन्दोलनका उद्देश्यबारे जानकारी गराइएको थियो। त्यसपछि उनीहरू कार्यकारी निर्देशक डा. उज्ज्वल चालिसेको कार्यकक्षमा पुगेर विरोध जनाउन गएका थिए। तर, आन्दोलनको जानकारी पाएपछि कार्यकारी निर्देशक बिदामा बसेको जानकारी दिइएको कर्मचारीहरूको भनाइ छ। आन्दोलनरत कर्मचारीहरूले आन्दोलकै कारण कार्यकारी निर्देशकले अर्कोलाई निमित्त दिएर बिदा लिएको दाबी गरेका छन्।