नेपालको विपत्तिमा बलिउड एकजुट, सोनु सुददेखि मनीषा कोइरालासम्मले दिए साथको सन्देश

काठमाडौं — नेपालमा आएको विनाशकारी बाढी र पहिरोपछि उद्धार तथा राहतको प्रयास जारी रहँदा भारतका चर्चित कलाकार तथा मनोरञ्जन क्षेत्रका व्यक्तित्वहरूले नेपालीप्रति ऐक्यबद्धता जनाएका छन्। सामाजिक सञ्जालमार्फत उनीहरूले बाढी प्रभावित परिवारप्रति दुःख व्यक्त गर्दै नेपालका लागि प्रार्थना र सहयोगको आह्वान गरेका छन्।

परोपकारी कामका लागि चर्चित अभिनेता सोनु सुदले नेपाललाई प्रत्यक्ष सहयोग गर्ने प्रतिबद्धता जनाएका छन्। उनले सामाजिक सञ्जालमा ‘नेपाल, तिमी एक्लो छैनौ’ भन्दै खाद्यान्न, आश्रय र पुनर्निर्माणमा सहयोग गर्ने बताएका छन्। सुदको यो भनाइलाई नेपालप्रति बलिउडबाट आएको सबैभन्दा बलियो सहयोगी सन्देशका रूपमा हेरिएको छ।