सामाजिक सञ्जालमा चर्को आलोचना भएपछि सरकारले हटायो शिक्षा र स्वास्थ्यमा लाग्दै आएको ३% कर

काठमाडौं । चालु आर्थिक वर्ष २०८३/०८४ मा निजी शिक्षा र स्वास्थ्य क्षेत्रमा लगाइएको समता करलाई लिएर सामाजिक सञ्जालमा व्यापक विरोध भएपछि सरकारले उक्त कर हटाउने घोषणा गरेको छ । प्रधानमन्त्री वालेन्द्र शाह (बालेन) ले मंगलबार एक स्टाटस लेख्दै उक्त क्षेत्रमा लगाइएको तीन प्रतिशत समता कर हटाउने निर्णय गरेको घोषणा गरेका हुन् ।

सरकारको उक्त करका कारण निजी विद्यालय वा कलेजको शुल्कमा ३ प्रतिशत थप हुँदा मध्यमवर्गीय अभिभावकलाई थप दबाब परेको भन्दै पछिल्लो समय सामाजिक सञ्जालमा व्यापक विरोध भइरहेको थियो । सरकारी विद्यालय तथा क्याम्पसको शिक्षाको गुणस्तर सुधार नगरी निजी क्षेत्रका शैक्षिक संस्थामा कर थपेको भन्दै आलोचना भएको हो । नेविसंघ, अभिभावक संघ नेपाललगायत विभिन्न सङ्गठनले समेत उक्त कर हटाउनुपर्ने माग राख्दै आएका थिए ।