समृद्धिको पर्याय बन्नुपर्छ ऊर्जा

‘पावर नेपाल’ राष्ट्रिय संवाद कार्यक्रममा माननीय ऊर्जा, जलस्रोत तथा सिँचाइमन्त्री, ऊर्जा क्षेत्रका विज्ञ, निजी क्षेत्रका प्रतिनिधि, लगानीकर्ता, विकास साझेदार तथा विभिन्न प्यानलिस्टहरूले व्यक्त गर्नुभएको विचार, अनुभव र दृष्टिकोणलाई ध्यानपूर्वक सुनेपछि एउटा गहिरो निष्कर्षमा पुग्न सकिन्छ– नेपालसँग सम्भावनाको अभाव छैन, अभाव छ त केवल साझा राष्ट्रिय संकल्प, समयमै निर्णय गर्ने इच्छाशक्ति, नीतिगत स्थिरता र प्रभावकारी कार्यान्वयनको। यही अनुभूति, राष्ट्रिय जिम्मेवारीबोध र नेपालको उज्ज्वल भविष्यप्रतिको आशावादलाई आधार बनाएर यो लेख तयार गरिएको हो।

नेपाल संसारका जलस्रोतका दृष्टिले सबैभन्दा सम्पन्न राष्ट्रहरूमध्ये एक हो। हिमालबाट अविरल बग्ने हजारौं नदी तथा खोलानाला, विशाल जलसम्पदा, प्राकृतिक उचाइको विविधता र स्वच्छ ऊर्जाको अथाह सम्भावनाले नेपाललाई दक्षिण एसियाको हरित ऊर्जा केन्द्रका रूपमा स्थापित हुन सक्ने अद्वितीय अवसर प्रदान गरेको छ।