सडकको अनधिकृत संरचना हटाउन बिर्तामोड नगरको १५ दिने अल्टिमेटम

काठमाडौँ । झापाको बिर्तामोड नगरपालिकाले सडकको क्षेत्राधिकार मिचेर निर्माण गरिएका अवैध भौतिक संरचनाहरू स्वेच्छाले हटाउन १५ दिने अन्तिम म्यादसहित पुनः ताकेता गरेको छ।

नगरपालिकाले सोमबार दोस्रोपटक सार्वजनिक सूचना जारी गर्दै बिर्तामोड र अर्जुनधारा नगरपालिकाको सिमानामा पर्ने महानन्द चोकदेखि मुक्तिचोक हुँदै देवनियासम्मको सडक क्षेत्रभित्र बनेका अनधिकृत संरचनाहरू १५ दिनभित्र आफैँ हटाउन अनुरोध गरेको हो। सडक विभागको समन्वयमा नापजाँच र रेखाङ्कनको काम सम्पन्न भइसकेको उक्त सडकको केन्द्र भागबाट दुवैतर्फ १५–१५ मिटर (कुल ३० मिटर) क्षेत्राधिकार तोकिएको छ।