प्रदीप अधिकारीविरुद्ध १ करोड ७१ लाख घुस लिएको आरोपमा मुद्दा दायर

काठमाडौँ- अख्तियार दुरुपयोग अनुसन्धान आयोगले नेपाल नागरिक उड्डयन प्राधिकरणका तत्कालीन महानिर्देशक प्रदीप अधिकारीविरुद्ध १ करोड ७१ लाख रुपैयाँ घुस लिएको तथा सम्पत्ति शुद्धीकरण (मनी लाउन्डरिङ) गरेको आरोपमा विशेष अदालत, काठमाडौँमा आरोपपत्र दायर गरेको छ।

अधिकारीले प्राधिकरणअन्तर्गतका ठेक्काको स्वीकृति, अनुगमन र भुक्तानी प्रक्रियामा आफ्नो पदको दुरुपयोग गर्दै ठेक्का प्राप्त गर्न सहजीकरण गरिदिएबापत गायत्री निर्माण सेवा तथा उक्त कम्पनीका प्रमुख प्रेम प्रकाश ढकालबाट १ करोड ७१ लाख रुपैयाँ घुस लिएको अनुसन्धानबाट खुलेको अख्तियारले जनाएको छ।