बर्डफ्लुले ध्वस्त व्यवसाय: कुखुरा फर्महरू पूर्ण क्षमतामा फर्कन कम्तीमा आठ महिना लाग्ने

देशका विभिन्न जिल्लामा फैलिएको बर्डफ्लु (एभियन इन्फ्लुएन्जा) र एच–९ इन्फ्लुएन्जा संक्रमणका कारण पोल्ट्री क्षेत्रमा तत्कालको क्षतिमात्र नभई उत्पादन चक्र नै अवरुद्ध भएको छ। व्यवसायीहरूका अनुसार संक्रमणका कारण प्रभावित फार्महरू कम्तीमा पाँचदेखि आठ महिनासम्म पूर्ण क्षमतामा सञ्चालनमा फर्कन नसक्ने अवस्था बनेको छ।

नेपाल पोल्ट्री महासंघका अध्यक्ष गुणचन्द्र विष्टका अनुसार बर्डफ्लुबाट करिब दुई अर्ब रुपैयाँ र एच–९ इन्फ्लुएन्जाबाट थप करिब दुई अर्ब रुपैयाँ बराबरको क्षति पुगेको छ। उनका अनुसार कुखुरा नष्ट हुनु मात्रै समस्या नभई उत्पादन रोकिनु, खोर खाली राख्नुपर्ने, बैंकको ब्याज तिर्नुपर्ने र बजार आपूर्तिमा कमी आउनुले किसानमाथि थप आर्थिक भार परेको छ।