गरिबले पाँच वर्ष लगाएर तयारी गर्छन्, तर ४० लाख हुने जो कोहीले परीक्षा किन्न सक्छ : नेता गान्धी

नीट प्रश्नपत्र चुहावट (पेपर लीक) र विद्यार्थीमाथि भएको प्रहरी दमनलाई लिएर भारतमा राजनीतिक तापक्रम बढेको छ। संसद्को मनसुन सत्र लगातार तेस्रो दिन पनि अवरुद्ध भएको छ। विद्यार्थीले बुधबार पनि आन्दोलन जारी राखेका छन्।

यसैबिच, लोकसभाका विपक्षी दलका नेता राहुल गान्धीले एक पत्रकार सम्मेलन गर्दै केन्द्र सरकारमाथि कडा प्रहार गरेका छन्। पत्रकार सम्मेलनमा भिडियो क्लिपहरू प्रदर्शन गर्दै गान्धीले विद्यार्थीहरूको आन्दोलनलाई दमन गरिएको बताए। उनले भने, ‘प्रहरी र सुरक्षा बलले शान्तिपूर्ण विरोध प्रदर्शन गरिरहेका विद्यार्थीहरूमाथि निर्ममतापूर्वक कुटपिट गरे। यो कति जायज छ?’ प्रदर्शनका क्रममा प्रहरीले आफूलाई समेत घिसारेको र मुक्का प्रहार गरेको उनले बताए।