फेवातालमा लागुऔषध सेवन गर्ने तीन डुङ्गा चालक प्रहरी नियन्त्रणमा

काठमाडौँ । पर्यटकीय नगरी पोखराको फेवातालमा डुंगा सयर गर्ने पर्यटकहरूको सुरक्षालाई मध्यनजर गर्दै प्रहरीले चालकहरू लक्षित मादक पदार्थ तथा लागुऔषध सेवन (मापसे/लापसे) सम्बन्धी विशेष जाँच अभियान सुरु गरेका छन्।

जिल्ला प्रहरी कार्यालय कास्की, वडा प्रहरी कार्यालय बैदाम र सामुदायिक प्रहरी सेवा केन्द्र जिल्ला समन्वय समिति कास्कीको संयुक्त आयोजनामा फेवातालका विभिन्न घाटहरूमा चालकहरूको स्वास्थ्य परीक्षण गरिएको हो। पोखरा महानगरपालिका–६ स्थित बाराहीघाट क्षेत्रमा सञ्चालन गरिएको यस अभियानका क्रममा ३२ जना डुंगा चालकहरूको परीक्षण गरिएको थियो। परीक्षणका क्रममा तीन जना चालकले लागुऔषध गाँजा सेवन गरेको पुष्टि भएपछि उनीहरूलाई नियन्त्रणमा लिइयो।