लापरबाहीले विपत्ति निम्त्याइरहने पोखराको फेवाताल

पोखरा । शान्त फेवाताल । तालैभरि पर्यटक डुंगा सयरमा रमाउँदै । यो फेवाको दैनिकी हो, जहाँ विश्वभरका पर्यटकहरु रमाउँछन्, घुम्छन् अनि मन्त्रमुग्ध हुन्छन् । फेवाताल जति सुन्दर छ, यहाँ हुने विपद् उत्ति नै दर्दनाक छ ।

झट्ट हेर्दा फेवाताल सुरक्षित नै देखिन्छ । तालबाराही मन्दिर जाने घाटमा सशस्त्र प्रहरीको टावर छ, जसले पर्यटकलाई ढुक्कको आभास दिइरहेकै हुन्छ । त्यो टावर आइपर्न सक्ने विपद्मा उद्धार गर्नका लागि बनाइएको हो, जसको नेतृत्व सशस्त्र प्रहरी बलले गर्छ भने नजिकै आर्मीको समेत उद्धार टोली छ । २४ घण्टा सुरक्षा निकाय तयार हुन्छ । सशस्त्र प्रहरीको गोताखोरसहितको टोली तयार अवस्थामा हुन्छ । घटनाबारे थाहा पाउनेबित्तिकै उनीहरु रवाना भइहाल्छन् । यति गर्दासमेत कतिपयको ज्यान जोगाउन मुस्किल हुन्छ । महिनैपिच्छे फेवामा दुर्घटना भइरहेकै हुन्छन् । गत महिना पनि सशस्त्र प्रहरीले एकदिन बिहान ३ बजे एक युवालाई तालबाट निकाल्यो ।