चिनियाँ नागरिक छुटाउन ७२ लाखको डिल, पूर्व एसएसपीदेखि चर्चित कलाकारसम्म पक्राउ

काठमाडौं– पर्यटक भिसामा नेपाल आएका चिनियाँ नागरिकमाथि भइरहेको अध्यागमन अनुसन्धानलाई प्रभावित पार्ने प्रयास भएको खुलासा भएको छ। नौ जना चिनियाँ नागरिकलाई छुटाइदिने र नियन्त्रणमा रहेका १५ वटा राहदानी फिर्ता गराइदिने भन्दै ७२ लाख रुपैयाँको ‘डिल’ भएको आरोपमा पूर्व सशस्त्र प्रहरी वरिष्ठ उपरीक्षक (एसएसपी), एक कलाकार र एक बिचौलियालाई प्रहरीले पक्राउ गरेको छ।

काठमाडौं उपत्यका अपराध अनुसन्धान कार्यालयले मंगलबार सशस्त्र प्रहरीका पूर्व एसएसपी गोपालबहादुर गुरुङ, कलाकार नारदप्रसाद खतिवडा र बिचौलियाको भूमिका खेलेका विक्रमबहादुर थापालाई पक्राउ गरी अनुसन्धान अघि बढाएको छ।