भारतीय जेलमा रहेका नेपाली किसानको शीघ्र रिहाइका लागि कांग्रेसको माग

नेपाली कांग्रेसले भारतीय जेलमा रहेका सर्लाहीका दुई नेपाली किसानको शीघ्र रिहाइका लागि सरकारसँग तत्काल कूटनीतिक पहल गर्न माग गरेको छ। पार्टीले रासायनिक मलको अभावका कारण भारतीय बजारबाट मल खरिद गरेर फर्किने क्रममा पक्राउ परेका किसानको अवस्थाप्रति गम्भीर ध्यानाकर्षण भएको जनाएको हो।

कांग्रेसका अनुसार सर्लाहीको बलरा नगरपालिका निवासी सुरेशप्रसाद सिंह र नागेन्द्रप्रसाद सिंह समयमै बजारमा रासायनिक मल उपलब्ध नभएपछि सीमावर्ती भारतीय बजार सोनवरसाबाट मल खरिद गरी फर्किने क्रममा भारतीय सुरक्षा निकायले पक्राउ गरेको थियो। उनीहरूलाई विगत २० दिनदेखि भारतको बिहार राज्यस्थित सीतामढीको डुमरा जेलमा राखिएको जनाइएको छ।