शिक्षक हराए, राज्य निदायो

हुम्ला । नेपालको संविधानले प्रत्येक बालबालिकालाई आधारभूत तहसम्म निःशुल्क र अनिवार्य शिक्षाको मौलिक अधिकार सुनिश्चित गरेको छ। हरेक बजेट भाषणमा शिक्षा पहिलो प्राथमिकता हुने घोषणा गरिन्छ। मन्त्रीहरू गुणस्तरीय शिक्षा, रूपान्तरण, डिजिटल विद्यालय र समृद्ध भविष्यका सपना बाँड्छन्। तर हुम्लाको चंखेली गाउँपालिका–१ रिमिस्थित दूधेदह आधारभूत विद्यालयको यथार्थले ती सबै भाषणलाई निर्मम रूपमा जिस्क्याइरहेको छ।

यहाँ चार महिनादेखि शिक्षक विद्यालय पुगेका छैनन्। विद्यार्थीले किताब खोलेर पाठ पढ्ने होइन, प्लेकार्ड बोकेर शिक्षक खोज्दै गाउँपालिका कार्यालय धाउनुपरेको छ। यो कुनै चलचित्रको दृश्य होइन, नेपालको सार्वजनिक शिक्षा प्रणालीको वास्तविक अनुहार हो।