शत्रुजीवको जोखिम रोक्न कृषि उपज आयात गर्दा सरकारको सर्त

काठमाडौंँ । पछिल्लो समय नेपाल सरकारले देशको कृषि क्षेत्र, जैविक सुरक्षा र खाद्य प्रणालीलाई विदेशी तथा उच्च जोखिमयुक्त शत्रुजीवहरूको आक्रमणबाट सुरक्षित राख्न नाकामा विभिन्न कडा सर्तहरू लागु गर्दै आएको छ ।

यसैक्रममा प्लान्ट क्वारेन्टिन तथा विषादी व्यवस्थापन केन्द्रले जोखिम विश्लेषणका आधारमा चीनबाट आयात हुने ताजा आँपमा नयाँ र कडा प्रवेश सर्तहरू कार्यान्वयनमा ल्याएको छ । यसअघि नेपालमा केरा, आँप, खरबुजा, बदाम, धनियाँ, एभोकाडोलगायत विभिन्न खाद्यान्न तथा फलफूलहरूको आयातमा समेत यसरी नै नियमन तथा कडाइ गरिसकिएको छ । सरकारको यो कदमले आयातमा पूर्ण प्रतिबन्ध लगाएको भन्दा पनि सुरक्षित र व्यवस्थित व्यापार प्रणाली स्थापित गर्न खोजेको अधिकारीहरूको स्पष्टोक्ति छ ।