बाढी र डुबानको सन्त्रासमा उपत्यकावासी

वर्षा सुरु भएपछि काठमाडौँ, ललितपुर र भक्तपुरवासी सहरी बाढीबाट प्रताडित हुने गरेका छन् । वर्षायाममा परेको पानीको निकास नहुँदा सहरी क्षेत्र नै डुबानमा पर्ने गरेको हो । विज्ञका अनुसार बागमती नदी र अन्य सहायक खोलाको बहाब क्षेत्र मिचेर संरचना निर्माण भएपछि एक दशकभन्दा बढी समयदेखि आसपासका बस्ती डुबानमा पर्ने गरेका हुन् ।

बागमती नदीसहित अन्य सहायक खोला किनारका बस्तीका नागरिकलाई सरकारले स्थानान्तरण गरिसकेको छ तर विभिन्न स्थानमा नदी, खोलामाथि अतिक्रमण कायम रहँदा वर्षायाममा पानी परेपछि सिधै खोलामा मिसिँदा ‘सहरी बाढी’ ले वितण्डा मच्चाउने गरेको हो । दुई दशकअघिसम्म काठमाडौँ उपत्यकामा खेतीले सोस्ने पानी अहिले सिधैँ खोलामा पुग्छ । सडक जलमग्न हुन्छन् ।