मेडिकल-नर्सिङमा ए-लेभल अमान्य

नेपालमा बेलायती पाठ्यक्रमअन्तर्गत सञ्चालन हुने एडभान्स लेभल (ए–लेभल) कार्यक्रमलाई सरकारले शैक्षिक रूपमा मान्यता दिँदै आएको छ। पाठ्यक्रम विकास केन्द्रले ए–लेभल उत्तीर्ण विद्यार्थीलाई कक्षा १२ सरहको समकक्षता प्रदान गर्दै आएको छ। तर पछिल्लो समय चिकित्सा शिक्षा आयोगले एमबिबिएस, बिडिएस, बिएससी नर्सिङ, बिएन तथा स्नातक तहका अन्य स्वास्थ्य विज्ञानका कार्यक्रममा भर्नाका लागि ए–लेभल पास गरेका विद्यार्थीलाई रोक लगाएको विषयले विद्यार्थी, अभिभावक र शैक्षिक संस्थाबिच अन्योल र असन्तुष्टि बढाएको छ।

विदेशी पाठ्यक्रम अध्ययन गर्ने विद्यार्थीलाई नेपालमा मेडिकल शिक्षा अध्ययन गर्न आवश्यक विषयगत आधारबारे कलेजहरूले पर्याप्त जानकारी नदिँदा तथा विद्यार्थी र अभिभावक पनि कक्षा १२ पछिको अध्ययनबारे स्पष्ट नहुँदा धेरै विद्यार्थी मेडिकल शिक्षा अध्ययनबाट वञ्चित हुने अवस्था देखिएको छ।