बाढी–पहिरोको कहर : कोशी र बागमतीका मुख्य राजमार्ग अवरुद्ध

काठमाडौं– अविरल वर्षासँगै आएको बाढी तथा पहिरोका कारण कोशी र बागमती प्रदेशका विभिन्न प्रमुख राजमार्ग तथा सडकखण्ड अवरुद्ध भएका छन्। नेपाल प्रहरीले सार्वजनिक गरेको विवरणअनुसार केही सडकखण्ड पूर्णरूपमा बन्द छन् भने केहीमा निश्चित समयका लागि सवारी आवागमन रोकिएको छ।

कोशी प्रदेशअन्तर्गत इलाम नगरपालिका–९ स्थित राजदुवाली क्षेत्रमा पहिरो खसेपछि मेची राजमार्ग पूर्णरूपमा अवरुद्ध भएको छ। पहिरोका कारण सडकमा सवारीसाधन सञ्चालन हुन सकेका छैनन्। सडक खुलाउने प्रयास भइरहेको प्रहरीले जनाएको छ।