एनसेलले नेपाली पब्लिक कम्पनी बन्न र स्वामित्व विवाद टुंग्याउन ३ विकल्पसहित सरकारलाई लेख्यो पत्र (पत्रसहित)

काठमाडौं- नेपालको सबैभन्दा ठूलो निजी दूरसञ्चार सेवा प्रदायक कम्पनी एनसेल आजियाटा लिमिटेडले आफ्नो शेयर स्वामित्वसँग सम्बन्धित विवाद समाधानका लागि सरकारसमक्ष फेरि औपचारिक पहल गरेको छ। कम्पनीले बुधबार प्रधानमन्त्री तथा मन्त्रिपरिषद्को कार्यालयमा विस्तृत पत्र बुझाउँदै विगतमा मन्त्रिपरिषद्, नेपाल दूरसञ्चार प्राधिकरण र दूरसञ्चार नियमावलीमार्फत भएका निर्णय तथा व्यवस्था पुनरावलोकन गर्न आग्रह गरेको हो।

कम्पनीले आफूले यसअघि २०८२ पुस २३ गते प्रधानमन्त्री तथा मन्त्रिपरिषद्को कार्यालय, सञ्चार तथा सूचना प्रविधि मन्त्रालय, उद्योग मन्त्रालय, उद्योग विभाग, नेपाल दूरसञ्चार प्राधिकरणलगायत सम्बन्धित निकायमा यही विषयमा पत्र पठाएको स्मरण गराउँदै हालसम्म कुनै औपचारिक सुनुवाइ नभएकाले पुनः पत्राचार गर्नुपरेको जनाएको छ।