ब्यालेटबाट जन्मिएका तानाशाहहरू

लोकतन्त्रको सबैभन्दा ठूलो शक्ति जनमत हो । जनताले आफ्नो मतमार्फत शासक चयन गर्छन् र आवश्यक परे फेरि परिवर्तन पनि गर्न सक्छन् । यही कारण लोकतन्त्रलाई संसारकै उत्कृष्ट शासन प्रणाली मानिन्छ । तर इतिहासले देखाएको अर्को कटु सत्य पनि छ । कहिलेकाहीँ यही जनमतको माध्यमबाट निर्वाचित नेतृत्व नै लोकतन्त्रको सबैभन्दा ठूलो शत्रु बन्न पुग्छ । बन्दुकको बलमा सत्ता कब्जा गर्ने सैन्य तानाशाहभन्दा जनताको मतबाट निर्वाचित भएर क्रमशः सबै लोकतान्त्रिक संस्थालाई कमजोर बनाउने लोकतन्त्रका लागि मन्द विषका रूपमा भूमिका निर्वाह गर्ने शासक धेरै खतरनाक हुन सक्छ ।

किनकि सैन्य तानाशाहको निरंकुशता खुलारूपमा देखिन्छ, तर निर्वाचित तानाशाहले लोकतन्त्रकै आवरण प्रयोग गरेर लोकतन्त्रलाई भित्रैबाट समाप्त गर्न सक्छ । लोकतान्त्रिक तानाशाहले लोकतन्त्रको विरुद्धमा लामो समय काम गरेर लोकतान्त्रिक मूल्य मान्यतालाई तहसनहस बनाइसकेपछि मात्रै यसको प्रभाव सर्वसाधारण नागरिकहरूले महसुस गर्न सक्छन् । यसमा पनि देशका सचेत नागरिकहरुले मात्रै यसको परिणामको विश्लेषण गरेर आफ्नो धारणा बनाउन थाल्छन् ।