इतर पक्षको दबाबपछि संवादमा गगन

नेपाली कांग्रेसमा संस्थापन र इतर समूहबीच पुनः संवाद सुरु भएको छ। यसअघि महामन्त्री गुरुराज घिमिरेमार्फत संवाद गरिएकामा यसपटक पार्टी सभापति गगन थापा आफैँले वार्ताको पहल गरेका छन्। पूर्वसभापति शेरबहादुर देउवा र मध्यमार्गी नेता शेखर कोइराला पक्षले राष्ट्रिय भेलाको तयारी अघि बढाएपछि थापा संवाद गर्न सक्रिय भएका हुन्।

कांग्रेसका संस्थापक नेता बीपी कोइरालाको ४४औँ स्मृति दिवसका अवसरमा बुधबार (६ साउन) काठमाडौँ, कमलादीस्थित नेपाल प्रज्ञा-प्रतिष्ठानमा देउवा र कोइराला पक्षले आयोजना गरेको कार्यक्रममा २९ साउनमा राष्ट्रिय भेला गर्ने घोषणा गरिएको थियो। संस्थापन पक्षसँग सहमतिको सम्भावना खासै नदेखिएको निष्कर्ष निकाल्दै दुवै समूहले राष्ट्रिय भेलामार्फत नयाँ कार्यदिशा तय गर्ने तयारी गरेका हुन्। इतर समूहका नेताहरूले नयाँ पार्टी गठनसम्मको बाटोमा अघि बढ्न सक्ने दबाबमूलक रणनीति लिएको भोलिपल्टै बिहीबार बिहान सभापति थापाले नेता कोइरालासँग भेटवार्ता गरेका छन्।