खर्च टार्न ऋण खोज्दै उखु किसान

नवलपरासी (वर्दघाट सुस्ता पश्चिम) का चिनी उद्योगहरूले समयमै उखुको भुक्तानी नदिँदा किसानहरू मर्कामा परेका छन्। जिल्लाका दुई चिनी मिलले किसानको साढे २७ करोडभन्दा बढी भुक्तानी दिन बाँकी छ। सरकारले यसपालि चिनी उद्योग/मिललाई किसानबाट खरिद गरेको कृषि उपजको भुक्तानी २५ दिनभित्र गर्न अन्यथा कारबाही हुने भनेको थियो। २०८२ चैतमा सार्वजनिक सरकारको शासकीय सुधारसम्बन्धी १०० कार्यसूचीमा यो विषय समावेश छ।

सरकारले कार्यसूची कार्यान्वयनका लागि जिल्ला प्रशासनमार्फत सम्बन्धित निकायलाई निर्देशन दिएको भनिए पनि नलवपरासीका किसानले पाँच महिनाअघि क्रसिङ गरेको उखुको करोडौं भुक्तानी अहिलेसम्म पाएका छैनन्।