भासिएको पुलमै गुडिरहेका छन् गाडी

एथेन्स । ग्रीसको थेसाली क्षेत्रस्थित पालायोपिर्गोस पुल दुई वर्षअघि भीषण बाढीका कारण भत्किएको थियो। सरकारी रूपमा पुल प्रयोग गर्न नमिल्ने घोषणा गरिए पनि स्थानीय चालकहरूले अझै दैनिक रूपमा त्यही पुल प्रयोग गरिरहेका छन्। वैकल्पिक मार्ग लामो र खर्चिलो भएकाले उनीहरू ज्यानकै जोखिम मोलेर पुल वारपार गर्न बाध्य छन्।

सन् २०२३ मा आएको ‘ड्यानियल’ आँधीले ग्रीस, बुल्गेरिया र टर्कीमा ठूलो जनधनको क्षति पुर्‍याएको थियो। उक्त आँधीसँगै आएको बाढीका कारण ग्रीसको थेसाली क्षेत्रमा मात्रै ७९ वटा पुल प्रयोग गर्न नमिल्ने अवस्थामा पुगेका थिए। तीमध्ये पालायोपिर्गोस पुल पनि एक हो, जसको बीचको भाग भासिएर संरचना गम्भीर रूपमा क्षतिग्रस्त भएको छ।