१५ वर्षमा पनि अधुरै भेरी–बबई डाइभर्सन

भेरी–बबई डाइभर्सन बहुउद्देश्यीय आयोजना नेपालका राष्ट्रिय गौरवका आयोजनामध्ये सबैभन्दा महत्त्वाकांक्षी सिँचाइ तथा जलविद्युत् परियोजनामा पर्छ। यसको उद्देश्य भेरी नदीको पानी सुरुङमार्फत बबई नदीमा खसालेर त्यस क्षेत्रमा सिँचाइ र विद्युत् उत्पादन गर्नु हो।

१५ वर्षअघि सुरु गरिएको आयोजना पटकपटक म्याद थपिँदा पनि अझै पूरा हुन सकेको छैन। २०७६ सालमा नै यसको १२.२ किलोमिटर लामो सुरुङको ‘ब्रेकथ्रु’ भएको थियो। तर प्रसारण लाइन, बाँध, विद्युत् गृह, सिँचाइ प्रणालीको काममा ढिलाइ हुँदा आम नागरिकका लागि आयोजना आकाशको फलजस्तै बन्न पुगेको छ भने लागत बढेको बढ्यै छ। सुरुमा १६.४३ अर्ब रुपैयाँ अनुमान गरिएको आयोजनाको संशोधित लागत ३३.२ अर्ब थियो। हालसम्म करिब १८.९२ अर्ब समयमा काम नहुँदा सम्भावित थप लागत अनुमान गरिएको छ। त्यसो हुँदा लागत करिब ४५ अर्बसम्म पुग्न सक्ने प्रक्षेपण गरिएको छ।