भजनमा ‘लम्बू सरकार’ले ल्याएको ‘क्रान्ति’ !

बुटवलमा हरेक शनिबार साँझ एउटा फरक दृश्य देखिन्छ। मन्दिर परिसरमा सयौँ होइन, हजारौँ युवा ढोल, मादल, गितार र झ्यालीको तालमा भजन गाउँदै झुमिरहेका हुन्छन्। कुनै बेला पाका पुस्ताको सीमित धार्मिक अभ्यास मानिने भजनलाई अहिले युवाले नयाँ शैली, नयाँ ऊर्जा र आधुनिक प्रस्तुतिमार्फत सामाजिक आन्दोलनकै रूप दिएका छन्।

यो परिवर्तनको केन्द्रमा छन्- कमल सापकोटा, जसलाई अधिकांशले ‘लम्बू सरकार’का नामले चिन्छन्। अध्यात्म, संगीत र सामाजिक अभियानलाई एउटै सूत्रमा गाँसेर उनले बुटवलमा भजनलाई नयाँ पुस्ताको आकर्षण मात्र बनाएका छैनन्, धार्मिक चेतना, सामाजिक एकता र सांस्कृतिक संरक्षणको अभियानका रूपमा पनि स्थापित गरिरहेका छन्।