राज्य र पत्रकारिता एक अर्काका प्रतिद्वन्द्वी होइनन्, परिपूरक हुन् : कार्यवाहक राजदूत पौडेल

जापान । जापानका लागि नेपाली कार्यवाहक राजदूत हरिहरकान्त पौडेलले राज्य र पत्रकारिता क्षेत्र एक अर्काका प्रतिद्वन्द्वी नभई परिपूरक भएको बताएका छन् । नेपाल पत्रकार महासङ्घ जापान शाखाको आयोजनामा टोकियोमा शनिबार आयोजित ‘एफएनजे ग्लोबल मिडिया कन्फरेन्स जापान २०२६’ मा बोल्दै पौडेलले सरकार र सञ्चार जगत् नङ र मासुको सम्बन्ध जस्तै मिलेर अघि बढ्नुपर्नेमा जोड दिएका हुन् ।

सम्बोधनका क्रममा कार्यवाहक राजदूत पौडेलले डिजिटल युगमा पत्रकारिताले नयाँ अवसरका साथै गम्भीर चुनौतीहरू पनि सामना गरिरहेको चर्चा गरे । विशेषगरी सामाजिक सञ्जालमार्फत फैलिने ‘मिथ्या सूचना’ र भ्रामक समाचारप्रति चिन्ता व्यक्त गर्दै उनले व्यावसायिक पत्रकारिता र तथ्यपरक सूचना सम्प्रेषणमा सचेत रहन आग्रह गरे । उनले भने, ‘हामीले प्रवासमा बसेर नेपाल र राज्यका निकायका बारेमा कस्तो सन्देश प्रवाह गरिरहेका छौँ भन्ने कुराले विदेशीहरूले हामीलाई हेर्ने दृष्टिकोण तय गर्छ, त्यसैले जिम्मेवार पत्रकारिता आजको आवश्यकता हो ।’