नेपाल र विश्वलाई जोड्न डायस्पोरा पत्रकारको भूमिका महत्त्वपूर्ण : निर्मला शर्मा

जापान । नेपाल पत्रकार महासङ्घकी केन्द्रीय अध्यक्ष निर्मला शर्माले प्रवासमा रहेका नेपाली पत्रकारहरू नेपाल र विश्वलाई जोड्ने सेतु भएको बताएकी छन् । नेपाल पत्रकार महासङ्घ जापान शाखाको आयोजनामा टोकियोमा शनिबार आयोजित ‘एफएनजे ग्लोबल मिडिया कन्फरेन्स जापान २०२६’ को उद्घाटन सत्रमा बोल्दै अध्यक्ष शर्माले डायस्पोराको आवाजलाई सशक्त बनाउन पत्रकारहरूको भूमिका महत्त्वपूर्ण हुने बताएकी हुन् ।

सम्बोधनका क्रममा शर्माले सूचना प्रविधिको विकाससँगै पत्रकारिता क्षेत्रले नयाँ अवसर र गम्भीर चुनौतीहरू एकैसाथ सामना गरिरहेको चर्चा गरिन् । ‘अहिले सामाजिक सञ्जालमा आउने सबै सामग्री पत्रकारिता होइनन्,’ उनले भनिन्, ‘हामीले युट्युब र टिकटकमा आउने भ्रामक सामग्री र व्यावसायिक पत्रकारिताबिचको रेखा छुट्ट्याउन जरुरी छ । सत्य, तथ्य र निष्पक्ष सूचना सम्प्रेषण नै पत्रकारको मुख्य धर्म हो ।’