अब सेल्फी भिडिओ राखेकै भरमा फेसबुकमा भेरिफाइड चेकमार्क निःशुल्क पाइने

काठमाडौं । फेसबुकले आफ्ना प्रयोगकर्ताका लागि अन्तरक्रिया गरिरहेको अकाउन्ट वास्तविक हो कि एआई सिर्जित हो भन्ने पहिचान गर्न सहज बनाउने उद्देश्यले नयाँ फिचर सार्वजनिक गरेको छ । सामाजिक सञ्जाल प्लेटफर्म फेसबुकले ‘फेसबुक भेरिफाइड’ नामक निःशुल्क भेरिफाइड ब्याज सुरु गरेको हो ।

कम्पनीका अनुसार प्रयोगकर्ताले छोटो सेल्फी भिडिओ पठाएपछि यो चेकमार्क लिन सक्छन् । एआई प्रविधिको बढ्दो विकाससँगै नक्कली प्रोफाइल, वास्तविक देखिने तस्बिर र स्वचालित कुराकानी तयार पार्न सजिलो भइरहेको समयमा फेसबुकले यो कदम चालेको हो । नयाँ ब्याजको मुख्य उद्देश्य अनलाइन अन्तरक्रियालाई थप विश्वसनीय बनाउनु रहेको फेसबुकले जनाएको छ । विशेषगरी अपरिचित व्यक्तिसँग जोडिनुपर्ने क्षेत्रमा यसको भूमिका महत्त्वपूर्ण हुने कम्पनीको भनाइ छ ।