पर्वतमा भारतबाट आयातित धानको बीउ प्रयोग गरेको खेतमा समस्या

पर्वत- धान रोपेको एक सातामै पातको मुन्टा सुक्न थालेपछि पर्वतको फलेवास नगरपालिका–६ देविस्थानका किसान चिन्तित बनेका छन्। धेरै उत्पादन हुने र सुगन्धित धानको आशामा भारतबाट आयातित बीउ प्रयोग गरेका किसान अहिले समस्यामा परेका हुन्।

स्थानीय किसान ठाकुरप्रसाद भुसालले घरवरिपरि लगाएको करिब आधा रोपनी क्षेत्रफलको धानखेतीमा रोपाइँ गरेको एक सातामै पात सुक्न थालेको बताए। उनले भने, ‘धेरै फल्ने र सुगन्धित धान हुने भनिएकाले यो जातको बीउ रोपेका थियौँ। तर रोपेको केही दिनमै पात सुक्न थालेपछि चिन्ता बढेको छ।’