नागरिक एपबाटै ग्लोबल आइएमई बैंकमा अनलाइन खाता खोल्न सकिने

काठमाडौँ / ग्लोबल आइएमई बैंक लिमिटेडले नागरिक एपसँग सहकार्य गर्दै नागरिक एपमार्फत नै बैंक खाता खोल्न सकिने नयाँ डिजिटल सेवा सुरु गरेको छ। यससँगै राष्ट्रिय परिचयपत्रका आधारमा नागरिक एपमा आबद्ध नेपाली नागरिकले अनलाइनबाटै ग्लोबल आइएमई बैंकमा व्यक्तिगत बचत खाता खोल्न सक्ने भएका छन्।

बैंकका अनुसार नागरिक एप प्रयोगकर्ताले बैंकको वेबसाइटमा उपलब्ध क्यूआर कोड स्क्यान गरी खाता खोल्ने प्रक्रिया सुरु गर्न सक्नेछन्। यस सेवाअन्तर्गत १८ वर्ष वा सोभन्दा माथिका, राष्ट्रिय परिचयपत्र बनाई नागरिक एपमा आबद्ध भएका नागरिकले बैंकमा अनलाइनमार्फत सहज रूपमा खाता खोल्न सक्नेछन्।