पूर्वी नेपालमा विद्युत् आपूर्ति सुधार्न प्राधिकरणको अनुगमन, बर्जु सबस्टेसन ३ महिनाभित्र सक्न निर्देशन

काठमाडौं। पूर्वी नेपालमा गुणस्तरीय, भरपर्दो र नियमित विद्युत् आपूर्ति सुनिश्चित गर्न नेपाल विद्युत् प्राधिकरणले मोरङ र सुनसरीका विद्युत् पूर्वाधार तथा वितरण प्रणालीको स्थलगत अनुगमन सुरु गरेको छ। विराटनगरसहित पूर्वी क्षेत्रमा पटक–पटक विद्युत् अवरुद्ध हुने र झ्याप्प–झ्याप्प बत्ती जाने समस्याबारे जनगुनासो बढेपछि ऊर्जा, जलस्रोत तथा सिँचाइमन्त्री विराजभक्त श्रेष्ठको निर्देशनमा प्राधिकरणको उच्च नेतृत्व अनुगमनमा गएको हो।

ऊर्जा मन्त्रालयका अनुसार मन्त्री श्रेष्ठले विद्युत् आपूर्तिमा देखिएका समस्या तत्काल समाधान गर्न आवश्यक पहल गर्न निर्देशन दिएपछि नेपाल विद्युत् प्राधिकरणका कायममुकायम कार्यकारी निर्देशक दीर्घायूकुमार श्रेष्ठ र वितरण तथा ग्राहक सेवा निर्देशनालय प्रमुखसमेत रहेका उपकार्यकारी निर्देशक राजन ढकाल नेतृत्वको टोली पूर्वी क्षेत्रमा पुगेको हो।