समस्याग्रस्त सहकारीका ४८ बचतकर्ताले पाए १२ लाख बचत फिर्ता

काठमाडौँ । समस्याग्रस्त सहकारी व्यवस्थापन समितिले नेपाल सरकारबाट समस्याग्रस्त घोषणा भएका सहकारीहरूको सम्पत्ति तथा दायित्व व्यवस्थापन गर्दै बचतकर्ताहरूलाई नियमित रूपमा रकम फिर्ता गरिरहेको छ । सहकारी ऐन, २०७४, सर्वोच्च अदालतको निर्देशनात्मक आदेश र नेपाल सरकारको १०० बुँदे घोषणापत्रअनुसार प्राथमिकीकरण गरी बचत फिर्ता भइरहेको छ।

समितिले ७० वर्ष उमेर पुगेका ज्येष्ठ नागरिक, स्वीकृतिप्राप्त चिकित्सकले प्रमाणीकरण गरेका प्राणघातक रोग लागेका बचतकर्ता, एकल महिला तथा पूर्ण अपाङ्ग वा अशक्त बचतकर्तालाई वार्षिक रूपमा एकपटक रकम उपलब्ध गराउँदै आएको छ। त्यसैगरी ५ लाख रूपैयाँभन्दा बढी बचत रहेका बचतकर्तालाई एकपटकमा बढीमा ५० प्रतिशत नबढ्ने गरी नियमित बचत फिर्ता गर्ने काम सुरु गरिएको छ।