दिल्लीमा प्रदर्शनकारीमाथि भएको प्रहरी दमनको काठमाडौँबाट निन्दा

काठमाडौँ । भारतको नयाँ दिल्लीलगायत विभिन्न स्थानमा जारी विद्यार्थी आन्दोलनमा भएको दमनप्रति नेपाली मानव अधिकारकर्मी, नागरिक सङ्घसंस्था, प्राज्ञिक, कानुन व्यवसायी तथा युवा अभियन्ताहरूले गम्भीर सरोकार र ऐक्यबद्धता व्यक्त गरेका छन्।

दिल्लीको जन्तर-मन्तर क्षेत्रमा शान्तिपूर्ण प्रदर्शनमा उत्रिएका विद्यार्थी र पत्रकारहरूमाथि गरिएको चरम बल प्रयोगको उनीहरूले कडा शब्दमा निन्दा गरेका छन्। साथै देशभर यस्ता आन्दोलनहरूलाई निरुत्साहित गर्न र नागरिकहरूलाई त्रसित पार्न भारतीय अधिकारीहरूले चालेका हस्तक्षेपकारी कदमहरूको पनि भर्त्सना गरिएको छ।