शहिद गंगालाल राष्ट्रिय हृदय केन्द्र र कोरियाली टोलीको सहकार्य : ७ बालबालिकाको मुटुको जटिल शल्यक्रिया

काठमाडौँ । सहिद गंगालाल राष्ट्रिय हृदय केन्द्रले कोरियाको ‘सोल नेशनल युनिभर्सिटी हस्पिटल’ का बाल मुटुरोग शल्यक्रिया टोलीलाई एक औपचारिक कार्यक्रमका बिच बिदाइ गरेको छ । बाल मुटुरोग शल्य चिकित्सक प्रोफेसर वुङ हान किमको नेतृत्वमा आएको विशेषज्ञ टोलीले केन्द्रका चिकित्सकहरूसँग मिलेर ७ जना बालबालिकाको जटिल तथा जोखिमयुक्त शल्यक्रिया सफलतापूर्वक सम्पन्न गरेको छ ।

केन्द्रका निमित्त कार्यकारी निर्देशक डा.रविन्द्रभक्त तिमलाका अनुसार अस्पतालको नयाँ नीतिअन्तर्गत बालबालिकाहरूको यो उपचार पूर्ण रूपमा निःशुल्क गरिएको हो । विगत ४–५ वर्षदेखि निरन्तर नेपाल आउँदै आएको यस टोलीमा शल्य चिकित्सकसँगै आइसियु नर्स, एनेस्थेटिस्ट र कार्डियोलोजिस्टहरू समेत सहभागी थिए ।