संविधानसँग बाझिएको भन्दै गण्डकीको गाँजा विधेयक प्रदेश प्रमुखद्वारा फिर्ता

पोखरा। गण्डकी प्रदेश सभाबाट सर्वसम्मत रूपमा पारित भएको औषधीय तथा औद्योगिक प्रयोजनका लागि गाँजा खेतीलाई नियमन गर्नेसम्बन्धी विधेयक प्रदेश प्रमुख डिल्लीराज भट्टले प्रमाणीकरण नगरी पुनर्विचारका लागि प्रदेश सभामै फिर्ता पठाएका छन्।

प्रदेश प्रमुखको कार्यालयका अनुसार प्रदेश सभा सचिवालयबाट ३० असार २०८३ मा प्रमाणीकरणका लागि प्राप्त विधेयक नेपालको संविधानको धारा २०१ को उपधारा (३) बमोजिम सन्देशसहित फिर्ता पठाइएको हो। कार्यालयका प्रवक्ता प्रवीण पौडेलद्वारा शुक्रबार जारी विज्ञप्तिमा विधेयक संविधान, संघीय कानुन तथा संघ, प्रदेश र स्थानीय तह (समन्वय तथा अन्तरसम्बन्ध) ऐन, २०७७ सँग बाझिएको उल्लेख गरिएको छ।