पाँच दर्जन केरामा देखिएको अर्थनीति

नेपालको सीमावर्ती सहरमा बस्ने एक महिला कामविशेषले भारततर्फ गएकी थिइन्। सीमापारि जानु त्यहाँ बस्ने नेपालीहरूका लागि कुनै नयाँ कुरा होइन। काम पर्दा, आफन्त वा साथीभाइलाई भेट्नुपर्दा अथवा दैनिक आवश्यकताका सामान किन्नुपर्दा उनीहरू सीमा वारपार गरिरहन्छन्।

नेपाल फर्किने क्रममा ती महिलाले बजारमा ठूला, पहेँला र राम्रो गुणस्तरका केरा देखिन्। उनले मूल्य सोधिन्– दर्जनको ८० रुपैयाँ। नेपालमा केरा प्रतिदर्जन करिब ३०० रुपैयाँमा बिक्री भइरहेको थियो। सस्तोमा पाइएको केरा परिवार र आफन्तका लागि कोसेली लैजाने विचारले उनले राम्रा केरा छानीछानी पाँच दर्जन किनिन्। तर, भारतको सीमा पार गरेर नेपाल प्रवेश गर्नेबित्तिकै उनलाई रोकियो। केरा लैजान पाइँदैन भन्दै सबै केरा खोसेर भुइँमा फ्याँकियो।