डुबानको दु:ख

गत ३२ असार र ५ साउनको दिउँसो केहीबेर परेको वर्षाले काठमाडौँको माइतीघर क्षेत्र जलमग्न भयो। सडक पोखरीमा परिणत हुँदा सवारीसाधन र पैदलयात्रीलाई आवतजावत गर्न कठिनाइ भयो। यो डुबानलाई एकथरी मौसमविद्ले विषम मौसमी घटना अर्थात् छोटो समयमै भारी वर्षा हुँदाको उपज भने। गृह मन्त्रालय मातहतको राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महत भने माइतीघर क्षेत्रको सन्दर्भमा आकस्मिक वर्षालाई सहायक कारण मात्रै मान्न सकिने बताउँछिन्। प्राधिकरणको नेतृत्वमा भएको अध्ययनले खाली जग्गामा अतिक्रमण, पुरानो ढल प्रणाली र प्लास्टिक, कपडाजस्ता फोहोरले पानी निकासमा गर्ने अवरोधले डुबान भएको निष्कर्ष निकालेको उनी बताउँछिन्। भन्छिन्, “विषम मौसमी परिस्थितिले मात्रै डुबान भएको होइन, पानीको निकास नै नधान्ने पुराना ढल-नाला र तिनमा अतिक्रमण हुँदा समस्या भएको हो।”

वर्षाले जलमग्न काठमाडौँको माइतीघर क्षेत्र। तस्बिर : नेपाल फ़ोटो लाइब्रेरी